TIRANË, 4 nëntor /ATSH/ Drejtoria Rajonale e Inspektoratit Kombëtar të Mbrojtjes së Territorit në Dibër bllokoi mbrëmjen e kaluar dy raste të transportit pa dokumentacion ligjor shoqërues të lëndëve drusore.
Ndërhyrja e parë u krye gjatë kontrolleve në aksin Muhur-Selishtë ndërsa e dyta në aksin që lidh Burrelin me Urakën. Gjatë verifikimit të kryer nga punonjësit e IKMT u konstatua se transportimi i lëndës drusore bëhej pa dokumentacionin ligjor.
Në të dy rastet lënda drusore u sekuestrua, duke iu vënë në dispozicion njësisë vendore, ndërsa ndaj drejtuesve të mjeteve u vendosën masat administrative në përputhje me përcaktimet ligjore.
Kontrollet për parandalimin dhe ndëshkimin e ndërhyrjeve të paligjshme në zonat pyjore vazhdojnë në të gjithë territorin e vendit.
/a.f/r.e/
