SPANJË, 3 nëntor/ATSH/ Sulmuesi i klubit spanjoll CD Tenerife, Jesús de Miguel, ka ndërruar jetë në moshën 30-vjeçare, pasi pësoi një goditje të rëndë gjatë ndeshjes kundër FC Andorra.
Futbollisti u përplas me portierin kundërshtar, Jesús Owono, në minutat e fundit të takimit, teksa të dy lojtarët po luftonin për topin. Pas përplasjes, De Miguel u rrëzua pa ndjenja në fushë dhe mori menjëherë ndihmën e stafit mjekësor.
Ai u transportua me ambulancë në spitalin Universitar Nuestra Señora de Candelaria, ku u shtrua në terapi intensive. Pavarësisht përpjekjeve mjekësore, futbollisti ndërroi jetë mëngjesin e 3 nëntorit, njoftoi klubi i Tenerife-s.
Përplasja shkaktoi gjithashtu ndërprerjen përfundimtare të ndeshjes, e cila ishte në rezultatin 2-2. Portieri i Andorrës u ndëshkua me karton të kuq për ndërhyrjen.
Klubi i Tenerife-s shprehu dhimbjen për humbjen e futbollistit dhe solidaritetin me familjen, të afërmit dhe tifozët, duke kërkuar respekt për privatësinë e tyre në këto momente të vështira.
Ndërkohë, autoritetet spanjolle kanë nisur procedurat hetimore për të shqyrtuar rrethanat e vdekjes së futbollistit.
