Marvin Çuni: S’pendohem për sakrificat, i fiksuar pas ëndrrës sime

TIRANË, 2 korrik /ATSH/ Marvin Çuni i ka idetë e qarta për të ardhmen. Ai është 18 vjeç dhe aktualisht është pjesë e moshave te gjigantët gjermanë, FC Bajern Mynih, por synon që në të ardhmen të ngjisë me shpejtësi shkallët e karrierës.

Në një intervistë për rubrikën “Talenti Shqiptar” të faqes zyrtare të Federatës në internet fshf.org, Çuni tregon për veten dhe për synimet që i ka vënë vetes.

18-vjeçari ka luajtur disa ndeshje me ekipet kombëtare të Shqipërisë, ndërsa ka spikatur me fanellën kuqezi.

Ndër të tjera, mesfushori i talentuar rrëfen edhe sakrificat që ka bërë për futbollin, por edhe regjimin e tij ditor.

“Dëshira për të luajtur futboll ka nisur që në moshën 3-vjeçare. Shikoja vëllanë tim më të madh dhe babain teksa stërviteshin bashkë dhe më pas babai nisi të stërvitej dhe me mua. Ai është shumë i lidhur me këtë sport, pasi ka luajtur vetë futboll dikur. Unë gjithmonë e kisha një top me vete kudo që shkonim, familja ime është shumë sportive”, shprehet ai.

I pyetu se cili ishte njeriu i parë që e afroi me futbollin dhe besoi tek ai, Çuni u shpreh se, “ka qenë pikërisht babai im, ai ka qenë trajneri im i parë. Familja më ka mbështetur shumë në këtë rrugëtim”.

“Stërvitem dy herë në ditë. Në mëngjes bëjmë fitnes dhe ushtrime atletike, ndërsa pasdite bëjmë një seancë të plotë stërvitje me ekipin. Edhe ditët e pushimit unë i shfrytëzoj për t’u stërvitur”, tregon ai, “aktualisht jemi pa aktivitete për shkak të pandemisë Covid-19, por unë po stërvitem shumë që të jem në formë për sezonin e ri”.

“Suksesi nuk është gjithmonë ai që të tjerët shohin. Do të duhet të sakrifikosh të gjithë kohën e lirë. Më mbetet shumë pak kohë për familjen dhe miqtë e mi. Nuk mund të qëndroj jashtë për shumë orë pasditeve, pasi të nesërmen në mëngjes duhet të paraqitem në stërvitje”, shton ai.

“Më parë, zakonisht ishin prindërit që më shoqëronin për në stërvitje me makinë pas punës, por ishte stresuese. Tani për fat të mirë mund t’i jap vetë makinës. Për t’u bërë një futbollist i mirë duhet të sakrifikosh shumë kohë, duhet të jesh gati në aspektin psikologjik dhe duhet të kesh durim.

Sidoqoftë, asnjëherë nuk jam penduar për çdo sakrificë dhe jam i fiksuar pas realizimit të ëndrrës sime për t’u bërë futbollist profesionist”, thotë ai.

I pyetur për synimet për të ardhmen, ai thekson se, “synimi im është të kaloj në skuadrën e parë të Bajernit të Mynihut ose të luaj në ligën e parë. E njëjta gjë edhe për Kombëtaren, synoj të luaj në skuadrën e parë dhe jam gati të punoj shumë për t’ia arritur. E di që konkurenca është shumë e fortë, por jam gati të matem me të gjithë në fushën e lojës”.

“Të luash futboll është kënaqësi dhe argëtim, por duhet të ruash përqendrimin dhe të ndjekësh gjithmonë objektivat që i ke vënë vetes. Nuk duhet të dëgjosh ata, të cilët duan t’ju dëmtojnë.

Asgjë nuk vjen nga hiçi. Duhet gjithmonë të punosh dhe të mbash parasysh objektivat e tu”, thekson më tej ai.

I pyetur se cili është idhulli i tij në kombëtaren ideale, Çuni u shpreh se, “Kombëtarja shqiptare ka një skuadër shumë të fortë dhe futbollistë mjaft të mirë. Ka aq shumë lojtarë të cilët mund t’i përmendja dhe që kanë shkruar historinë e futbollit shqiptar. Gjithsesi, modeli i lojtarit të cilit i jam referuar gjithmonë është Kristiano Ronaldo”.

/gj.m/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.