TIRANË, 6 dhjetor /ATSH/ Ministri i Shtetit për Marrëdhëniet me Parlamentin, Taulant Balla, priti në takim presidentin e Institutit Italian për Kujdesin e Punëtorëve Giuliano Zignani.
Balla tha se, gjatë takimit diskutuan mbi të drejtat dhe përkujdesjen ndaj punëmarrësve shqiptarë në Itali.
Gjithashtu gjatë takimit u diskutua mbi marrëveshjen për pensionet mes dy vendeve dhe mënyrat për të lehtësuar proceset për të dyja komunitetet.
“Ky takim shënon një hap të rëndësishëm për thellimin e lidhjeve mes dy brigjeve të Adriatikut dhe për përmirësimin e shërbimeve që i ofrohen qytetarëve tanë” tha Balla.
ITAL, Instituti për Mbrojtjen dhe Ndihmën e Punëtorëve me përvojë mbi 70-vjeçare, luan një rol të rëndësishëm në mbështetjen e qytetarëve, veçanërisht emigrantëve dhe komuniteteve në nevojë, duke ofruar asistencë sociale, shërbime për pensionet dhe mbrojtjen e të drejtave sociale e të punës. /j.p/
