TIRANË, 13 prill/ATSH/ Qeveria shqiptare do të nisë përdorimin e biletave elektronike në transportin rrugor ndërqytetës, duke i dhënë fund përdorimit të biletave në format të shtypur.
Ministrja e Infrastrukturës dhe Energjisë, Belinda Balluku deklaroi sot se ndryshimet në vendimin për përcaktimin e rregullave për përdorimin e biletave në transportin rrugor janë miratuar në Këshillin e Ministrave.
“Këto ndryshime bëhen me qëllim plotësimin e kuadrit ligjor për përdorimin e sistemit e-transport”, deklaroi ministrja pas përfundimit të mbledhjes së qeverisë.
Ndryshimet, tha ajo, janë në përputhje me ligjin për transportin rrugor dhe në ligjin për faturën dhe sistemin e monitorimit të qarkullimit.
“Ky projektligj sjell disa risi të rëndësishme pasi hiqen biletat në format të shtypur për transportin ndërqytetës. Prerja e biletave do të bëhet përmes sistemit elektronik të fiskalizuar e-transport, online, ose përmes pajisjeve. Prerja e biletave do të bëhet në agjenci, mjete, autobus ose kudo tjetër”, bëri të ditur Balluku.
Ndërkohë, tha ajo, platforma elektronike garanton ciklin e plotë të prerjes së biletave dhe shtohen elementët e faturës së fiskalizuar.
/r.e/
