TIRANË, 18 janar /ATSH/ Konferenca e Parë Ndërqeveritare mes Shqipërisë dhe Bashkimit Evropian duhet të mbahet sa më shpejt të jetë e mundur.
Ambasadori i Bashkimit Evropian në Tiranë, Luigi Soreca zhvilloi sot një takim me ambasadorin Themos Demiris, Sekretar i Përgjithshëm i Ministrisë së Jashtme të Greqisë.
Soreca u shpreh nëpërmjet një reagimi në rrjetet sociale se në takim u diskutua mbi gjendjen e procesit të integrimit të Shqipërisë në BE.
“Kënaqësi të takoja ambasadorin Themos Demiris, Sekretar i Përgjithshëm i Ministrisë së Jashtme të Greqisë. Diskutuam mbi gjendjen e procesit të integrimit të Shqipërisë në BE. Konferenca e Parë Ndërqeveritare duhet të mbahet sa më shpejt të jetë e mundur. Është e rëndësishme që Shqipëria të mbajë fokusin në axhendën e reformave dhe të përgatitet për bisedimet e pranimit”, u shpreh ambasadori i BE-së Luigi Soreca.
/j.p/r.e/
