TIRANË, 14 dhjetor /ATSH/ – “Reforma në Drejtësi është një reformë e guximshme, kurajoze dhe unike dhe ne jemi të vendosur ta shpiem atë deri në fund”, – deklaroi sot Kryetari i Kuvendit, Gramoz Ruçi në një takim me Kryetarin e Gjykatës Europiane të Drejtësisë, Koen Lenaerts
“Ditët e fundit janë zgjedhur Këshilli i Emërimeve në Drejtësi, Këshilli i Lartë i Prokurorisë dhe Këshilli i Lartë Gjyqësor dhe po vazhdon puna edhe për ndërtimin e organeve të tjera të qeverisjes së sistemit të drejtësisë. Procesi i Vetingut po ecën me sukses dhe ka mbështetjen e plotë të Kuvendit të Shqipërisë”, – tha Ruçi.
Kryetari i Kuvendit nënvizoi se veprimtaria e Kuvendit të Shqipërisë aktualisht është përqendruar në tre aspekte kryesore: Vazhdimin me sukses e vendosmëri të Reformës në Drejtësi dhe procesit të Vetingut; Realizimi i “detyrave të shtëpisë” së Shqipërisë për të kurorëzuar me sukses hapjen e negociatave në qershor 2019; Kurorëzimi me sukses i reformës zgjedhore. Por Reforma në Drejtësi është prioriteti më i rëndësishëm i Kuvendit të Shqipërisë.
Kryetari i Gjykatës Europiane të Drejtësisë, Koen Lenaerts, nënvizoi se, “Shqipëria është një vend i rëndësishëm për BE-në, pikërisht për vlerat dhe arritjet e saj. Ne shpresojmë që negociatat të çelen në qershor 2019 dhe BE do të pasurohet duke pranuar një vend me frymë europiane si Shqipëria. Me Rreformën në Drejtësi, e cila është në udhë të mbarë, dhe procesin e Vetingut, po hidhni bazat për një drejtësi dhe një gjyqësor të pavarur. Vlerësoj gjithashtu punën që keni bërë për përafrimin e legjislacionit shqiptar me legjislacionin e BE-së”.
/gj.mima/ /a.g/
