LONDËR, 19 maj /ATSH-AFP/ – Princi Harry dhe Meghan Markle u shpallën sot zyrtarisht të martuar gjatë një ceremonie plot emocion në bazilikën St George të kështjellës Windsor, vend historik për monarkinë britanike.
Çifti u shpall i martuar nga peshkopi i Canterbury Justin Welby, shefi shpirtëror i Kishës anglikane, pasi shkëmbyen zotimet e tyre para rreth 600 të ftuarve, përfshirë dhe mbretëreshën Elizabeth II dhe një plejadë yjesh.
Ish-aktorja amerikane, Meghan Markle mbërriti sot në mesditë në kështjellën Windsor duke shënuar kështu fillimin e ceremonisë martesore me princin Harry.
E veshur me një fustan nga shtëpia franceze e modës “Givenchy”, Meghan hyri e vetme në kishë ku u prit nga princi Charles, në mungesë të babait të saj të sëmurë.
Më herët mbretëresha Elizabeth II i akordoi çiftit, Harry dhe Meghan titullin e dukës dhe dukeshës të Sussex-it./
/ec/
