TIRANË, 24 janar/ATSH/ Ministrja e Turizmit dhe Mjedisit, Mirela Kumbaro shprehu sot mirënjohjen për të gjitha strukturat e angazhuara në operacionin e kërkim-shpëtimit të dy turistëve zviceranë të bllokuar në Malin e Korabit, në kushte të vështira të terrenit dhe motit.
Kumbaro ndau në rrjetet sociale momente nga operacioni i kërkim-shpëtimit, ndërsa i bëri thirrje të gjithë turistëve që vizitojnë zonat malore të Shqipërisë, të kërkojnë shërbimin e guidave lokale për të shmangur problematikat dhe incidentet që paraqesin rrezik për jetën.
“Mirënjohje për strukturat e policisë së Shqipërisë dhe Kosovës, Shërbimin e Kërkim-Shpëtimit Malor, Federatën e Alpinizmit të Kosovës, Ministrinë e Mbrojtjes, KFOR dhe banorët e zonës, që falë një operacioni të mirëkoordinuar bënë të mundur shpëtimin e dy turistëve zviceranë të bllokuar në Malin e Korabit, në kushte të vështira të terrenit dhe motit”, u shpreh Kumbaro.
“Të bëjmë turizëm të bukur, por të sigurt”, u shpreh ajo. /m.m/
