TIRANË, 29 qershor/ATSH/ Një ekip me efektivë të Policisë Ushtarake do të jenë pjesë për herë të parë e Forcës Shumëkombëshe dhe Vëzhguesve në Sinai, Egjipt.
Sipas Ambasadës së Shteteve të Bashkuara të Amerikës (SHBA) në Tiranë, ky dislokim shënon herën e parë që një vend ballkanik ka kontribuar me forca në këtë mision.
“Përgëzime Shqipërisë për vendosjen e njësisë së saj të Policisë Ushtarake në Forcën Shumëkombëshe të Vëzhguesve (MFO). Ky dislokim shënon herën e parë që një vend ballkanik ka kontribuar me forca në këtë mision. MFO është një mision trepalësh që përfshin SHBA-në, Izraelin, Egjiptin dhe shumë partnerë ndërkombëtarë për të mbështetur zbatimin e dispozitave të sigurisë të Traktatit të Paqes Egjipt-Izrael. MFO bën përpjekjet më të mira për të parandaluar çdo shkelje të kushteve të traktatit”, thuhet në një deklaratë të ambasadës në rrjetet sociale .
/r.e/
