TIRANË, 12 dhjetor /ATSH/ Në kuadër të takimeve informuese në qytete të ndryshme të vendit kryetarja e Komisionit për Integrimin Evropian, Jorida Tabaku dhe zëvendëskryetarja, Etilda Gjonaj zhvilluan një seancë informuese me studentë e pedagogë të Universitetit “Luigj Gurakuqi”, të qytetit të Shkodrës.
Në fokus të bisedimeve procesi i Integrimit Evropian të vendit, nevoja për përfshirjen e të gjithë aktorëve dhe grupeve të interesit, për ta bërë atë një proces gjithëpërfshirës.
Studentët e pranishëm në takim shprehën se reformat kryesore në vend si ajo në drejtësi, apo reformat ekonomike janë të rëndësishme për të ardhmen e tyre dhe të vendit dhe shprehën nevojën që deputetë të jenë më pranë qytetarëve për të rritur bashkëpunimin dhe të dëgjojnë zërat e tyre. /j.p/
