PARIS, 12 dhjetor /ATSH-DPA/-Presidenti francez, Emmanuel Macron ka shtyrë për herë të dytë prezantimin e planeve të tij të diskutueshme të reformës së pensioneve, teksa përpiqet të gjejë mbështetje për një nga projektet më të rëndësishme të mandatit të tij të dytë.
Prezantimi i projektligjit do të shtyhet nga 15 dhjetori në 10 janar, njoftoi sot Macron.
Kjo duhet të lejojë udhëheqësit e rinj të partive konservatore, “Républicains” dhe “French Greens”, të cilët u zgjodhën në fundjavë, të diskutojnë reformën me qeverinë.
Plani është që të rritet mosha e pensionit nga 62 në 64 ose 65.
Kjo është vonesa e dytë në përgatitjen e reformës së pensioneve. Në shtator, kryeministrja Élisabeth Borne mori tre muaj kohë shtesë për konsultime me partnerët socialë dhe partitë.
Macron, vështirë se mund ta shtyjë reformën pa mbështetjen e kampeve të tjera politike, pasi që nga zgjedhjet e fundit parlamentare, qeveria e tij liberale nuk ka më një shumicë absolute në parlament.
Mundësia e vetme do të ishte përdorimi i një rregulli të veçantë që lejon që një projekt të konsiderohet i miratuar edhe pa një vendim parlamentar. Megjithatë, nëse Macron dëshiron ose jo të shkojë kaq larg, kjo nuk dihet ende.
Presidenti Macron shpreson në mbështetjen e partisë konservatore “Républicains” për reformën e pensioneve./a.i/
