PRISHTINË, 16 mars/ATSH/ Nga dita e sotme pezullohen të gjitha fluturimet nga aeroporti i Prishtinës “Adem Jashari”.
Duke filluar nga ora 00:00 e datës 16 mars ka hyrë në fuqi vendimi i qeverisë së Kosovës, që u mor të premten në mbrëmje, për pezullimin e fluturimeve nga Aeroporti i Prishtinës.
Përjashtim bëjnë linjat e udhëtimit në ardhje me ekuipazh, por pa udhëtarë që shërbejnë vetëm për largim të udhëtarëve nga Kosova.
Kjo u bë si masë shtesë pas konfirmimit të rasteve pozitive me virusin CODIV-19.
“Nga data 16 mars 2020 ora 00:00, bëhet pezullimi i përkohshëm i të gjitha linjave të udhëtimit ajror në Aeroportin e Prishtinës, përveç fluturimeve ushtarake, dhe emergjencave medicinale (MEDIVAC). Përjashtim bëjnë linjat e udhëtimit në ardhje me ekuipazh, por pa udhëtarë që shërbejnë vetëm për largim të udhëtarëve nga Kosova”, thuhet në vendimin e Qeverisë së Kosovës.
Kjo ishte një nga masat që janë ndërmarrë gjatë këtyre ditëve për të parandaluar përhapjen e koronavirusit.
Gjithashtu është marrë vendim edhe për mbylljen e kufijve tokësorë për udhëtarët që hyjnë në Kosovë, por kjo nuk vlen për qytetarët kosovarë. Të gjithë shtetasit e Kosovës të cilët hyjnë përmes këtyre kufijve do t’iu nënshtrohen kontrolleve të shtuara mjekësore me urdhrin që ata të vetizolohen për 14 ditë./KosovaPress/
