PRISHTINË, 14 mars /ASTH/ Komisioni Qendror i Zgjedhjeve (KQZ) ka bërë të ditur sot se zgjedhjet lokale në komunën e Podujevës do të mbahen, pavarësisht se janë dy raste të konfirmuar në Kosovë me koronavirus.
Kryetarja e KQZ-së Valdete Daka, në mbledhjen e KQZ-së, tha se zgjedhjet do të mbahen, pasi nuk kanë ndonjë rekomandim tjetër nga Instituti i Shëndetit Publik.
“Në emër të KQZ kam komunikuar me të gjitha institucionet relevante dhe meqë nga IKShPK nuk ka ndryshim të rekomandimit, ne vazhdojmë sipas planit operacional. I lus ata që do të jenë në vendvotim t’i përmbahen ta gjitha masave. Qytetarët i inkurajoj që të mos bëjnë tollovi dhe t’i përmbahen rekomandimeve të qeverisë”, tha ajo.
Mbrëmjen e kaluar kryeministri Kurti në konferencën për shtyp pas mbledhjes së jashtëzakonshme të qeverisë u shpreh se zhvillimin apo jo të zgjedhjeve në Podujevë këtë të dielë do ia linte në dorë organeve kompentente, respektivisht KQZ dhe rekomandimeve të Institutit të Shëndetit Publik.
Dita e sotme është ditë e heshtjes zgjedhore në Podujevë.
/KosovaPress/
