TIRANË, 1 shtator/ATSH-Maela Marini/ – Transformimi i gjithë vijës bregdetare të Radhimës në një vijë për këmbësorët dhe krijimi i një minibypass-i, një rrugë tjetër e re me gjatësi prej 7 km, është projekti i radhës i qeverisë në Vlorë.
Duke folur për projektet që do të zbatohen në Vlorë, Kryeministri Edi Rama u ndal te projekti që kthen rrugën ekzistuese të Radhimës në rrugë këmbësore si lungomare.
Po bëhemi gati, tha ai, për vazhdimin e projektit nga tuneli deri në Orikum, ndërsa më tej vazhdohet paralelisht me segmentin Orikum-Llogara, rruga që lidhet me bypass-in e ri të Vlorës.
Kryeministri foli për një tjetër projekt i cili nis së shpejti nga zbatimi, siç është vazhdimi i Lungomares nga pika ku mbaron aktualisht deri te tuneli.
Po ashtu, Rama u ndal te projekti i rrugës që lidh Kuçin me pjesën poshtë të bregdetit.
“Do të bëhet në Himarë një lidhje e re që afron edhe Nivicën në një kohë shumë të shkurtër dhe i jep akses prodhimeve bujqësore dhe blegtorale”, – tha Rama.
Segmentet e tjera të rrugës së Lumit të Vlorës që janë me financim të huaj, sipas Ramës, kanë procedura më të komplikuara. “Garat janë mbyllur për dy segmentet e tjera dhe pritet të fillojë puna”, – tha ai.
Një vlerë e shtuar në sezonin e ardhshëm turisitik, sipas Ramës, do të jetë edhe bulevardi i ri i Vlorës. /e.caushi/
