ATHINË, 22 shtator /ATSH-MIA/ – Bashkimi Evropian duhet të jetë konsekuent dhe i besueshëm në detyrimet ndaj Ballkanit Perëndimor dhe Greqia është e gatshme të ndërmarrë rol konstruktiv në procesin integrues të rajonit, deklaroi zëvendësministri i Jashtëm grek, Miltiadis Varvitsiotis në takimin me komisionerin evropian për Zgjerimin, Oliver Varhelyi, njoftoi sot Ministria greke e Punëve të Jashtme.
Varvitsiotis edhe njëherë përsëriti mbështetjen e fuqishme të Greqisë për zgjerimin e BE-së me vendet e rajonit, ndërkohë që informoi eurokomisionerin Varhelyi edhe për nismën e marrë në Selanik, ku Ballkani Perëndimor u përfshi në dialogun për të ardhmen e Evropës.
Sipas kabinetit të Varvitsiotisit, Varhelyi deklaroi se ishte i kënaqur nga nisma greke dhe e përshëndeti rolin aktiv të Greqisë në promovimin e idesë evropiane në Ballkan.
”Komisionerit Varhelyi i theksova se Greqia e mbështet fuqishëm perspektivën evropiane të Ballkanit Perëndimor. BE-ja duhet të jetë konsekuente dhe e besueshme ndaj tyre. BE-ja është më e fuqishme kur është e bashkuar”, shkroi Varvitsiotis në profilin e tij zyrtar në Twitter./ a.jor.
