TIRANË, 23 gusht/ATSH/ Kryeministri Edi Rama përsëriti sot apelin ndaj gjykatësve në rrethe, që të mos vazhdojnë me avazin e tyre të vjetër të mosndëshkimit të krimit barbar të zjarrvënies, i cili në Kodin Penal të Republikës së Shqipërisë dënohet deri 15 vjet burg.
Rama ndau në rrjetet sociale momente nga kapja e autorit të zjarrvënies në kodrat e Kurbinit, vlerësoi punën e Policisë së Shtetit në kapjen e autorëve të këtyre krimeve.
“Një bravo e madhe për Policinë e Shtetit që këtë verë u është qepur këmba-këmbës zjarrvënësve, duke arritur t’i kapë dhe çojë prapa hekurave, si në rastin e kriminelëve që i vunë zjarrin pyllit në Laç, për të cilët përsëris, si për gjithë të arrestuarit e tjerë, apelin në adresë të gjykatësve në rrethe, që të mos vazhdojnë me avazin e tyre të vjetër të mosndëshkimit të një krimi barbar si ky, i cili në Kodin Penal të Republikës së Shqipërisë dënohet deri 15 vjet burg”, tha Rama.
Rama vlerësoi po ashtu edhe punën e Agjencisë së Mbrojtjes Civile, e cila sipas tij, e ka rritur ndjeshëm nivelin e performancës gjatë këtij sezoni turistik.
“Një falënderim i përsëritur për trupat e Agjencisë së Mbrojtjes Civile, e cila e ka rritur ndjeshëm nivelin e performancës gjatë këtij sezoni turistik, duke e mbrojtur me profesionalizëm e shpirt sakrifice pasurinë e paçmueshme natyrore dhe ulur në mënyrë të konsiderueshme dëmet potenciale të këtyre krimeve të neveritshme në verbërinë, shpirtligësinë, marrëzinë e tyre”, tha ai. /m.m/
