MOSKË/BRATISLAVË, 27 dhjetor /ATSH-DPA/ – Presidenti rus Vladimir Putin tha se Rusia është e hapur që Sllovakia të presë bisedimet e mundshme të paqes që synojnë t’i japin fund luftës në Ukrainë.
Putin u tha gazetarëve në veri të Shën Petërburgut se kryeministri sllovak Robert Fico e bëri propozimin gjatë vizitës së tij në Moskë të dielën e kaluar, duke sugjeruar Sllovakinë si një vend për negociata.
Kreu i Kremlinit vuri në dukje qëndrimin neutral të Sllovakisë si një faktor që e bën atë një vend të përshtatshëm për diskutime të tilla.
Megjithatë, komentet e Putinit kanë shkaktuar kundërshtim të fortë në Sllovaki.
Michal Simecka, kreu i partisë më të madhe opozitare, e kritikoi idenë në një postim në Facebook, duke e quajtur “absurde” që politika e jashtme e Sllovakisë të komunikohet nga dikush tjetër përveç qeverisë së tyre.
Ai iu referua Putinit si kriminel.
“Nëse Fico dëshiron paqe, ai së pari duhet t’i kërkojë Putinit të ndalojë sulmet e tij dhe të ndalojë vrasjen e njerëzve të pafajshëm në Ukrainë”, tha Simecka.
Ndërkohë, Ministria e Jashtme në Bratislavë konfirmoi të enjten në mbrëmje në një deklaratë të disponueshme për dpa se ishte ofruar të shërbente si një vend për bisedimet e mundshme të paqes ruso-ukrainase.
”Sllovakia i kishte përcjellë vullnetin e saj qeverisë ukrainase më herët në tetor”, tha ministria, duke theksuar angazhimin e saj për një zgjidhje joushtarake dhe gatishmërinë e saj për të kontribuar në përpjekjet për paqe./ a.jor.
