BRUKSEL, 13 dhjetor /ATSH-DPA/ – Komisioni Evropian njoftoi sot se do të fillojë dërgimin e pothuajse 100 tonë furnizime shëndetësore dhe sende të tjera thelbësore në Turqi për t’i shpërndarë më tej në Siri.
“Rënia e regjimit të Assadit ofron shpresë të re për popullin sirian. Por, ky moment ndryshimi mbart gjithashtu rreziqe dhe sjell vështirësi”, tha presidentja e Komisionit Evropian Ursula von der Leyen.
”Furnizimet përfshijnë ushqime, ilaçe dhe sende strehimi”, tha ajo.
Von der Leyen do të udhëtojë në Turqi të martën për të diskutuar shpërndarjen e ndihmave humanitare me presidentin turk, Recep Tayyip Erdogan.
”Artikujt do të dorëzohen në qytetin jugor turk të Adanas, ku do t’i dorëzohen UNICEF-it dhe Organizatës Botërore të Shëndetësisë për shpërndarje brenda Sirisë”, tha komisioni.
BE-ja nuk ka përfaqësim në Siri dhe nuk ka marrëdhënie zyrtare me vendin.
Komisioni njoftoi gjithashtu një fond shtesë prej katër milionë eurosh (4,2 milionë dollarë) për organizatat e ndihmës aktive në Siri, duke rritur ndihmën humanitare të bllokut në 163 milionë euro në 2024.
Sipas shifrave të BE-së, blloku ka mobilizuar më shumë se 33 miliardë euro në ndihmë humanitare dhe ekonomike për të mbështetur sirianët në vend dhe në të gjithë rajonin që nga viti 2011./ a.jor.
