TIRANË, 20 mars /ATSH/ Ministri i Brendshëm, Taulant Balla reagoi sot për punën e Policisë së Tiranës që ndodhet drejt zbardhjes së ngjarjes kriminale të disa ditëve më parë në Fushë-Krujë.
Balla u shpreh se, “detyra e Policisë së Shtetit është të parandalojë ose të zbardhë çdo ngjarje kriminale dhe të vendosë para drejtësisë fajtorët”.
“Sapo kam përgëzuar drejtuesit e Drejtorisë Vendore të Policisë Tiranë për punën e deritanishme hetimore në drejtim të zbardhjes së ngjarjes kriminale disa ditë më parë në Fushë-Krujë”, nënvizoi Balla.
“Pres gjithashtu rezultate edhe në drejtim të identifikimit të autorëve të ngjarjeve në Vlorë, Lezhë dhe Shkodër”, theksoi më tej Balla.
Ministri theksoi se, “autorët apo porositësit e ngjarjeve kriminale mund të fshihen për një kohë, brenda dhe jashtë vendit, mund të tentojnë t’i shmangen ekstradimeve, por detyra e Policisë së Shtetit është t’i gjejë kudo që fshihen dhe t’i vendosë para drejtësisë”.
Për këtë qëllim, shtoi ai, “duhet punë e pandërprerë hetimore dhe bashkëpunim me agjencitë partnere dhe me qytetarët, informacionet e të cilëve janë shumë të vlefshme”.
“Dy persona të kërkuar nga drejtësia janë ndaluar/ekstraduar gjatë 24 orëve të fundit”, përfundoi Balla.
