TIRANË, 11 mars /ATSH/ Dita e Verës do të jetë një festë e vërtetë në kryeqytet.
Në kuadër të kësaj dite të shënuar, bashkia e Tiranës ka parashikuar organizimin e një sërë aktivitetesh për të gjitha grupmoshat, duke filluar që nga fëmijët e deri tek të rriturit, teksa një vend të veçantë do të zërë “Panairi i makinave RETRO”.
Drejtoria e Përgjithshme e Shërbimeve të Transportit Rrugor, njofton se në Ditën e Verës, sheshi “Skënderbej” do të kthehet në një ambient argëtues ku do të ketë një ekspozitë të madhe nga koleksioni i makinave RETRO.
DPSHTRR-ja ndau në rrjete sociale posterin e Panairit të Makinave RETRO, teksa bëri të ditur se, gjatë 24 orëve do të zhvillohen 34 aktivitete në sheshin “Skënderbej”.
“Pranvera vjen më bukur me RETRO! Vijojmë festimet për Ditën e Verës në stacionin tonë të radhës, Tiranë, te sheshi ‘Skënderbej’, me festë, muzikë dhe plot surpriza të bukura na presin, ndaj mos mungoni! Mos harroni veroret, simbol i kësaj dite të veçantë, për të pritur ndryshe dallëndyshet këtë vit”, njoftoi DPSHTRR.
