PEKIN, 27 tetor /ATSH-DPA/ – Ish-kryeministri kinez Li Keqiang, 68 vjeç, vdiq sot pasi pësoi një atak të papritur kardiak në Shangai, sipas agjencisë shtetërore kineze të lajmeve, Hsinhua.
Ish-kryeministri pësoi një atak kardiak, të enjten në mbrëmje dhe vdiq pasi përpjekjet për ta ringjallur dështuan.
Li Keqiang kishte dhënë dorëheqjen si kryeministër në mars pas 10 vitesh në detyrë, nën presidentin kinez Xi Jinping.
Li Keqiang u lind më 1 korrik 1955 në Dingyuan, në provincën lindore të Anhui, djali i një funksionari.
Në vitin 1974 gjatë Revolucionit Kulturor, ai u detyrua të shkojë në fshat si intelektualët e tjerë.
Si një nga vetëm 3% e të gjithë aplikantëve që arritën të pranoheshin, ai studioi drejtësi në Universitetin e Pekinit dhe fitoi një doktoraturë në Ekonomi.
Xi dhe Li Keqiang ishin favoritët për të pasuar presidentin e atëhershëm dhe udhëheqësin e Partisë Komuniste Kineze Hu Jintao, por Xi fitoi dhe Li, i konsideruar si një i mbrojtur i Hu, duhej të kënaqej me postin e kryeministrit.
Li Keqiang u mënjanua efektivisht nga Xi, dhe përfundimisht u zëvendësua nga Li Qiang në mars.
Ka pasur dyshime për shëndetin e Li Keqiang prej vitesh.
”Gjatë vizitave të tij jashtë vendit, pushimet e gjata duhej të futeshin gjithmonë në orarin e tij”, raportonin diplomatët në biseda konfidenciale./ a.jor.
