TIRANË, 15 mars/ATSH/ Në lotin 7 të Unazës së Madhe të Tiranës puna po avancon, falë edhe bashkëpunimit me banorët, të cilët kanë mbështetur realizimin e këtij projekti.
Kryeministri Edi Rama ndau sot në rrjetet sociale pamje nga ky kantier punimesh, ndërsa theksoi se “puna nuk do të ndalet deri në përfundimin e plotë të të gjithë veprës”.
Sipas tij, në këtë zonë projekti nuk parashikon vetëm ndërtimin e aksit për qarkullimin e automjeteve, por do të ketë edhe hapësira të dedikuara për qytetarët.
Në lotin e 7-të të Unazës Verilindore po punohet me ritme të shpejta, me gërmim për formimin e trasesë së rrugës, mbushjen dhe betonimin e pilotave.
Autoritetet janë në fazën e zbatimit të dy segmenteve që plotësojnë Unazën e Madhe të Tiranës: pjesën nga rrethrrotullimi “Shqiponja” deri te Bulevardi i Ri dhe aksin nga Bulevardi i Ri në Shkozë.
Në këtë aks parashikohet të ndërtohen vepra arti dhe rrugë dytësore, të cilat do të lidhin unazën me zona të tjera të kryeqytetit.
Unaza e Madhe e kryeqytetit përbën një segment prej 27 kilometrash të gjatë. Përfundimi i saj në fund të vitit 2023 lehtëson trafikun brenda Tiranës, ndërsa e lidh kryeqytetin me të gjitha rrugët dalëse kombëtare.
/m.m/r.e/
