FLORIDA, 29 shtator /ATSH-AA/ – Një studim i zhvilluar në SHBA zbuloi se pandemia e COVID-19 ka shkaktuar ndryshime të personalitetit veçanërisht tek të rriturit e rinj.
Sipas lajmit në “News Medical”, në kuadër të studimit të zhvilluar nga një ekip në Fakultetin e Mjekësisë së Universitetit Shtetëror të Floridës, janë ekzaminuar efektet e pandemisë së COVID-19 në personalitet.
Studiuesit analizuan personalitetin e 7.109 personave, krahasuan tiparet e personalitetit të modelit me pesë faktorë: “neuroticizmi, ekstroversioni, çiltërsia, pajtueshmëria dhe përgjegjësia”.
Periudhat që u morën parasysh në hulumtim u klasifikuan si: para pandemisë (maj 2014-shkurt 2020), periudha e hershme e pandemisë (mars-dhjetor 2020) dhe periudha e vonshme e pandemisë (2021-2022).
Është zbuluar se në fazat pas pandemisë, të rriturit e rinj bëhen më të ashpër, më të prirur ndaj stresit, më pak bashkëpunues dhe besimplotë dhe më pak të përgjegjshëm.
Nuk kishte ndryshime të rëndësishme statistikore në grupin e të rriturve më të vjetër, megjithëse ndryshime të vogla u vunë re tek të rriturit e moshës së mesme (30 deri në 64 vjeç).
Kryeautorja e hulumtimit profesoresha Angelina Sutin tha se: “Ende nuk e dimë vallë këto ndryshime janë të përkohshme ose të përhershme, por nëse vazhdon mund të kenë ndikime afatgjata”.
Hulumtimi u publikua në revistën shkencore të recensionuar “PLOS ONE”.
