TIRANË, 17 nëntor/ATSH/ Kryeministri Edi Rama zhvilloi sot një vizitë zyrtare, në Itali ku në qendër të vëmendjes ishte njohja e pensioneve të shqiptarëve që jetojnë në shtetin fqinj.
Rama ndau një fotoalbum me momentet kryesore të kësaj vizite të rëndësishme.
Rama u prit paraditen e sotme me një ceremoni zyrtare në Palazzo Chigi, në Romë, nga kryeministri i Italisë, Mario Draghi. Pas takimit dypalësh, Rama dhe homologu italian, Draghi, zhvilluan edhe një konferencë të përbashkët për shtyp.
Kryeministri italian, Mario Draghi deklaroi se integrimi i Ballkanit Perëndimor në Bashkimin Europian nuk është diçka që varet nga shkaqe rrethanore, por është e shkruar në të ardhmen e Bashkimit Europian.
Në vijim të vizitës së tij në Itali, kryeministri Rama u prit në një takim në Campidoglio, Romë, nga kryetari i ri i bashkisë, Roberto Gualtieri.
Kryebashkiaku i Romës theksoi se, “Italia mbeten vend mik i Shqipërisë dhe e mbështet atë në procesin e integrimit europian, një perspektivë e zgjerimit të BE-së”.
Kryeministri Rama u prit po ashtu në një takim nga ministri i Jashtëm italian, Luigi Di Maio, me të cilin dha një deklaratë të përbashkët për shtyp nga Palazzo della Farnesina, Romë.
Di Maio konfirmoi se “Italia mbështet hapjen e negociatave për anëtarësimin e Shqipërisë në Bashkimin Europian, para fundit të vitit”.
Më herët Di Maio dhe Kryeministri Rama drejtuan mbledhjen e parë të Komitetit të përbashkët për çështjet ekonomiko-sociale mes dy vendeve, që ishte lançuar para një vitit gjatë vizitës së Di Maio-s në Tiranë.
/m.m/
