TIRANË, 8 nëntor/ATSH/ Kampionati shqiptar i futbollit ka luajtur këtë fundjavë ndeshjet e javës së 8-të.
Tirana konfirmohet si pretendentja kryesore për titullin kampion, pasi triumfon 4-0 në derbin ndaj Dinamos dhe thellon distancën nga ndjekësit në renditjen e kampionatit.
Në një atmosferë mjaft të zjarrtë në “Air Albania”, bardheblutë bënë ndeshjen e tyre karakteristike, duke u mbrojtur me kujdes dhe kundërsulmuar shpejt, teksa pikërisht nga një rast i tillë, gjetën avantazhin në minutën e 45-të me një autogol të Sidibe.
Edhe pjesa e dytë pati të njëjtin ritëm, me të besuarit e Shehit, që kapën në dy kundërsulme mbrojtjen dinamovite dhe shënuan dy herë të tjera me Xhixhën, në minutën e 56-të dhe 61-të. Fitorja 4-0 u vulos nga Hoti në minutën e 82-të.
Kjo fitore e ngjit Tiranën në kuotën e 20 pikëve, 6 më tepër se Kukësi i vendit të dytë.
Në javën e 8-të Partizani arriti fitoren e parë në kampionat. Të kuqtë e drejtuar nga tekniku Ilir Daja fituan me rezultatin e pastër 0-2 në transfertën e Kamzës ndaj Kastriotit, falë golave të Emiliano Mustës dhe Arinaldo Rrapajt.
Ulja e Mirel Josës në stol ka ndryshuar për mirë Laçin. Bardhezinjtë fituan 2-0 ndaj Teutës falë golit të Mentor Mazrekajt në minutën e 42’ dhe golit të Guindo në minutën e dytë shtesë të sfidës. Kjo është fitorja e tretë radhazi në Abissnet Superiore për ekipin kurbinas, që janë ngjitur në vendin e katërt.
Skënderbeu gjen fitoren e parë sezonale dhe e bën atë në ndeshjen që pritej më pak, atë përballë Kukësit në sfidën e parë të javës së 8-të të Abissnet Superiores, ku ia doli të triumfojë me rezultatin 2-1.
Pas një pjese të parë me pak emocione, ishte fraksioni i dytë i lojës ai që rezervoi emocione të shumta.
Në minutën e 54-t ishte Dumfour që kaloi në avantazh korçarët, ndërsa Mensah dyfishoi rezultatin në minutën e 84-t. Për Kukësin goli i vetëm u shënua me 11-metërsh nga Hila në minutën e 99-të.
Java e 8-të mbyllet sot me sfidën mes Egnatias dhe Vllaznisë në në Rrogozhinë, ku pritet një ndeshje e fortë, pasi të dyja skuadrat kanë nëntë pikë në klasifikim.
Renditja e Abissnet Superiore
Skuadra Pikët
1 Tirana 20
2 Kukësi 14
3 Teuta 12
4 Laçi 11
5 Vllaznia 9
6 Egnatia 9
7 Dinamo 9
8 Partizani 8
9 Skënderbeu 6
10 Kastrioti 5
/r.e/
