TIRANË 1 nëntor/ATSH-I.Vata/ Komisioni i Pavarur i Kualifikimit shkarkoi sot me shumicë votash nga detyra Ardian Brahon, prokuror pranë Gjykatës së Rrethit Gjyqësor Tiranë
Komisioni i Pavarur i Kualifikimit zhvilloi sot një seancë për shpallje vendimi për subjektin e rivlerësimit Ardian Braho.
Ardian Braho, prokuror pranë Gjykatës së Rrethit Gjyqësor Tiranë iu nënshtrua Vetingut për tre kriteret e vlerësimit, atë të pasurisë si dhe kriterin etik dhe profesional më 27 tetor.
Trupa gjykuese e përbërë nga Lulzim Hamitaj, Genta Tafa (Bungo), Suela Zhegu pasi analizoi provat dhe faktet vendosi, shkarkimin nga detyra të Ardian Brahos, prokuror pranë Gjykatës së Rrethit Gjyqësor Tiranë.
Ardian Braho i përfundoi studimet në Shkollën e Magjistraturës në vitin 2001 dhe u emërua si prokuror në Krujë. Në vitet 2003-2007, ai e ushtroi funksionin në Prokurorinë e Krimeve të Rënda dhe prej vitit 2007 punon si prokuror në Prokurorinë e Rrethit Tiranë. /j.p/
