BRUKSEL/FRANKFURT/PARIS, 7 shtator /ATSH-DPA/ – Eurozona u rimëkëmb me një ritëm më të shpejtë se sa ishte parashikuar në tremujorin e dytë të vitit nga rënia ekonomike e shkaktuar nga pandemia Covid, treguan të dhënat e rishikuara nga Eurostat.
Prodhimi i Brendshëm Bruto u rrit me 2,2 për qind në mënyrë të njëpasnjëshme në tremujorin e dytë, më shumë se parashikimi fillestar prej 2,0 për qind.
Rritja përmbysi rënien prej 0,3 për qind në tremujorin e parë dhe rënien prej 0,4 për qind në tremujorin e katërt të vitit 2020.
Nga viti në vit, PBB-ja u rrit në 14,3 për qind në vend të parashikimit të mëparshëm prej 13,6 për qind.
”Me të dhënat e rishikuara që tregojnë se ekonomia e euro zonës eci edhe më mirë nga sa mendohej më parë në tremujorin e dytë, Banka Qendrore Evropiane (BQE) është e sigurt që do të rishikojë parashikimet e saj të PBB-së të enjten”, tha ekonomisti i ”Capital Economics”, Jack Allen-Reynolds.
”BQE tha gjithashtu se politika e lirë monetare është ende e nevojshme”, shtoi ekonomisti.
Shpenzimet e familjeve dhe qeverisë dhe formimi i kapitalit bruto kontribuan pozitivisht në rritjen e PBB-së.
Kontributi nga bilanci i jashtëm ishte afër normales.
Bazuar në orët e punës, produktiviteti në krahasim me të njëjtin tremujor të vitit të kaluar u ul 1,5 për qind./ /p.s./
