UASHINGTON, 6 gusht /ATSH-AA/ – Sekretari amerikan i Shtetit, Antony Blinken deklaroi se vendi i tij do të qëndrojë përkrah Ukrainës në konfliktin e saj me Rusinë.
Blinken u takua në Departamentin amerikan të Shtetit me ministrin e Jashtëm ukrainas, Dmytro Kuleba, në përgatitje për takimin e parë të presidentit amerikan Joe Biden në Shtëpinë e Bardhë me presidentin e Ukrainës Volodymyr Zelensky, më 30 gusht.
“Sekretari Blinken theksoi angazhimin e SHBA ndaj sovranitetit dhe integritetit territorial të Ukrainës përballë agresionit të vazhdueshëm të Rusisë atje”, tha zëdhënësi Ned Price në një deklaratë pas takimit.
“Sekretari dhe homologu i tij ukrainas diskutuan gjithashtu mundësitë për të thelluar bashkëpunimin midis Ukrainës dhe SHBA”, shtoi ai./ a.jor.
