ANKARA, 29 prill /ATSH-AFP/- Turqia tejkaloi zyrtarisht numrin e 3 000 vdekjeve nga koronavirusi i ri, njoftoi sot Ministria e Shëndetësisë.
Sipas ministrisë, 89 njerëz humbën jetën midis të martës në mbrëmje dhe të mërkurën në mbrëmje, duke çuar në 3 081 numrin e përgjithshëm të vdekjeve për shkak të COVID-19.
Në 24 orët e fundit janë regjistruar edhe 2 936 raste infektimi të reja, duke e çuar në 117 589 numrin e tyre të përgjithshëm zyrtar që nga fillimi i pandemisë.
“Turqia po kalon fazën e pikut të epidemisë, madje duke vënë re një trend në rënie në shfaqjen e rasteve të reja”, tha ministri i Shëndetësisë, Fahrettin Koca.
Ai shtoi se rreth 7 500 punonjës të shëndetësisë janë infektuar, ose rreth 6,5% e numrit të përgjithshëm të rasteve të infektimit me virus.
Për të luftuar kundër kësaj pandemie, Turqia ka marrë masa të tilla si mbylljen e shkollave, ndalimin e ngjarjeve kulturore dhe sportive, si edhe vendosjen e kufizimeve të specifikuara gjatë fundjavës./ /ervo/
