TIRANË, 26 prill /ATSH/ -“Sektori shëndetësor ndodhet në kolaps për shkak të keqmenaxhimit”, – deklaroi sot kryetari i PD-së, Lulzim Basha në hapjen e takimit rajonal “Sistemet shëndetësore, vizione dhe sfida”.
Basha shtoi se me ardhjen e PD-së në pushtet paga minimale e mjekëve do të jetë 1200 euro dhe ajo e infermierëve 700 euro.
“Pa zgjedhje të lira nuk mund të ketë bashkëjetesë demokratike dhe as Bashkim Europian. Do të kem mundësinë për një shpalosje të plotë të programit për nxjerrjen e shëndetësisë nga kolapsi ku ndodhet. Keqmenaxhimi e çoi shëndetësinë në gjendje kome. Sot shqiptarët paguajnë më shumë për shëndetësinë dhe shëndetësia bën shërbim më të keq”, – tha Basha.
Sipas kreut të PD, shëndetësia në Shqipëri renditet e fundit në Ballkan.
“Sistemi shëndetësor në Shqipëri është primitiv. Në tre vitet e fundit Shqipëria renditet e fundit për cilësinë në shëndetësi. Treguesit kanë ardhur në përkeqësim që në 2013. Financimi është më i ulëti, janë rritur shpenzimet e PPP-ve. Në radhë të parë këtu vendoset se çfarë do të vidhet sa do vidhet dhe kush e vjedhë në hesap të kujt. Mos të flasim pastaj për check-up, i cili na i nxjerrë burrat me barrë dhe gratë me probleme me prostatë”.
Kryetari i PD-së tha se sektori i farmaceutikës në Shqipëri ka qenë një ndër sektorët më korruptiv në Shqipëri, por edhe në vendet e tjera të Ballkanit Perëndimor.
“Sektori i farmaceutikës në Shqipëri dhe Ballkan ka njohur një korrupsion të madh në këto vite. I gjithë sistemi është në kolaps, sepse ka asgjësuar perspektivën e zhvillimit të paktën për momentin. Dua të them se krijimi i monopoleve gjigante private të financuara prej buxhetit ka futur në kolaps institucionet shëndetësore. Gjendja në spitale është katastrofike. Ka mungesa medikamentesh. Mungesat nuk kanë fund, marrin përmasa afrikane të Afrikës qendrore siç është mungesa e Paracetamolit në urgjencat”, – theksoi Basha.
Basha u ndal edhe tek rastet e dhunës në spitale, ndërsa renditi edhe arsyet që e prodhojnë atë.
“Nuk kalon javë pa pasur goditje, përplasje në spitalet e vendit. Rrogat më të ulëta në rajon. Rrogat më të larta nuk kapin as gjysmat e rajonit. Rajoni i ka rritur, ndërsa ne nuk kemi indeksuar as për inflacionin. Ky është një nivel që nuk është parë as në vitet 70. Numri i specialiteteve disa herë më i ulët, pagat katastrofë. Të gjithë dështimin mundohen t’ia faturojnë bluzave të bardha. Mjekët dhe infermierët përpiqen t’u shërbejnë qytetarëve, por po e bëjnë shërbimin si në spitale lufte. Spitalet e rretheve kanë mbetur vetëm në godina. Shërbim shëndetësor është i varfër, pak mjekë dhe pak ilaçe. Këto probleme nuk zgjidhen sa hap dhe mbyll sytë, por kemi nisur një diskutim me të gjitha grupet për të hartuar politikat e duhura dhe përmirësimin e sistemit shëndetësor. Me ardhjen e PD në pushtet paga minimale e doktorëve do të arrijë 1200 euro në muaj dhe për infermierët në 700 euro në muaj. Ky është realiteti në Kosovë. Ky është synimi dhe objektivi. Këto do të jenë pagat minimale në sektorin shëndetësor. Unë zotohem sot këtu para jush se këtë objektiv do ta bëjmë realitet”, – shtoi Basha.
Kjo konferencë u mbështet nga Fondacioni “Konrad Adenauer” me pjesëmarrjen e ekspertëve gjermanë, francezë, shqiptarë nga Shqipëria dhe Kosova.
/gj.mima/j.p/
