PEKIN, 23 prill /ATSH-AFP/ – Kina dhe Rusia do të bllokojnë çdo përpjekje për të sabotuar marrëveshjen bërthamore të nënshkruar në vitin 2015 me Iranin, theksoi sot kreu i diplomacisë ruse, Sergei Lavrov duke gjykuar çdo rishikim të tekstit të papranueshëm, ndërkohë që Donald Trump kërcënoi me tërheqje të SHBA-së.
“Ka përpjekje për të ndërhyrë në rendin ndërkombëtar nga i cili varen Kombet e Bashkuara”, deklaroi Lavrov në përfundim të një takimi në Pekin me homologun kinez, Wang Yi.
“Marrëveshja bërthamore iraniane e vitit 2015, arritur nga fuqitë e mëdha me Teheranin për ta penguar këtë të fundit të pajiset me armë bërthamore është një prej realizimeve më të mëdha të diplomacisë këto vitet e fundit dhe çdo rishikim i këtij dokumenti është i papranueshëm”, theksoi ministri rus.
“Ne e themi qartë, së bashku me Kinën, se do të bllokojmë çdo përpjekje për të sabotuar këto marrëveshje që janë miratuar në kuadër të një rezolute të OKB-së”, konfirmoi Lavrov.
Ai u shpreh një ditë para një takimi të Organizatës për Bashkëpunim në Shangai (OCS), forum që mbledh katër vende të Azisë Qendrore si dhe Kinën dhe Rusinë./
/ec/
