TIRANË, 9 Mars/ATSH/ – Korporata Elektroenergjitike Shqiptare informon se situata hidroenergjetike në kaskadën e Drinit po përmirësohet dhe prurjet natyrale në orën 17:00 rezultojnë në 116O m3/sek. Sipas KESH sonte në orën 23:00 do reduktohen më tej shkarkimet duke mbyllur plotësisht portat e shkarkimit. “Duke parë tendencën në rënie të prurjeve natyrale, parashikimet meteorologjike për ditët në vijim dhe me qëllim dhënien e kontributit të saj në lehtësimin e aspekteve operacionale të shtabit të emergjencave civile të qarkut të Shkodrës, Korporata Elektroenergjitike Shqiptare gjykoi të mundshme që sonte në orën 23:00 të reduktojë më tej shkarkimet duke mbyllur plotësisht portat e shkarkimit dhe përpunuar prurjet përmes ngarkimit maksimal të mundshëm të turbinave për prodhim energjie”- thuhet në njoftimin e KESH.
