TIRANË, 13 gusht /ATSH-I.Vata/- Dogana shqiptare ju vjen në ndihmë qytetarëve që hyjnë në pikat e kalimit kufitar të Kakavijës, Murriqanit, Hanit të Hoti dhe Kapshticës, për shkak të radhëve të krijuara nga fluksi i pasagjerëve në hyrje dhe dalje.
Në një njoftim në faqen e saj zyrtare, Dogana shqiptare bën të ditur se punonjësit e Doganës kanë shpërndarë ujë të ftohtë për qytetarët.
“Rritja e fluksit të kalimit të pasagjerëve në hyrje dhe dalje ka krijuar radhë në Pikat e Kalimit Kufitar të Kakavijës, Murriqanit, Hanit të Hoti dhe Kapshticës, ku një pjesë janë emigrantë që kthehen në vendet e tyre të punës. Për t’iu ardhur në ndihmë në këto temperatura të larta, punonjësit e Doganës kanë shpërndarë ujë të ftohtë për qytetarët. Me përkushtim, profesionalizëm dhe efikasitet të gjitha strukturat doganore në pikat kufitare, po punojnë në funksion të rritjes së intensitetit të pasagjerëve dhe fluksit të turistëve gjatë këtij sezoni veror”, thuhet në njoftim.
