TIRANË, 6 janar /ATSH/ Vaksinimi në kohë i fëmijëve është një hap shumë i rëndësishëm për t’i mbrojtur ata sot dhe për t’u krijuar një të ardhme të shëndetshme.
Ministrja e Shëndetësisë dhe Mbrojtjes Sociale, Albana Koçiu u ka bërë thirrje prindërve që të sigurohen që t’i vaksinojnë në kohë fëmijët e tyre.
“Për një fëmijëri të shëndetshme, vaksinat janë thelbësore! Fruthi, rubeola dhe shytat janë sëmundje që mund të shmangen plotësisht nëse fëmijët vaksinohen në kohë, sipas kalendarit kombëtar të vaksinimit”, thotë ministrja në një postim në Facebook.
Ministrja Koçiu u ka bërë thirrje prindërve që të kujdesen që fëmijët të marrin të gjitha dozat e nevojshme në kohën e duhur.
“Konsultohuni me mjekun pediatër për çdo pyetje apo shqetësim dhe siguroni mbrojtje të plotë për ta sot, për një të ardhme të shëndetshme nesër”, thekson ministrja Koçiu.
/a.f/r.e/
