TIRANË, 29 dhjetor /ATSH/ Ministri i Brendshëm, Ervin Hoxha, foli sot nga pika kufitare e Kakavijës, ku ishte i pranishëm për të inspektuar hyrjet dhe daljet e qytetarëve për festat e fundvitit. Hoxha u takua me disa përfaqësues të palës greke, ku kërkoi më shumë mbështetje dhe angazhim.
“Sot bashkërisht me drejtorin e përgjithshëm të Policisë së Shtetit dhe drejtorin e departamentit të Policisë Kufitare vizituam pikën kufitare të Kakavijës. Në inspektim pata mundësinë të takoja edhe drejtuesit e Policisë greke, me të cilët ndava disa shqetësime. Javën e kaluar pata një bisedë me ambasadoren greke mbi planin e masave për të përballuar fluksin e qytetërëve shqiptarë në pikën kufitare Kakavijë dhe pikat e tjera. Masat janë marrë në përballimin e këtij fluksi”, u shpreh ministri Hoxha.
Ministri i Brendshëm, theksoi se “bashkë me drejtuesin e Policisë greke vizituam edhe qendrën e koordinimit, e cila është ngritur në zbatim të marrëveshjeve ndërqeveritare, funksionon si e tillë në bashkëpunim me forcat greke dhe shqiptare. Falënderoj përfaqësuesit e Frontex-it. Në bazë të marrëveshjes që kemi nënshkruar me Frotenx-in dhe qeverisë shqiptare për migracionin e paligjshëm. Kemi pasur suksese në nivele shumë të mira, emigracioni i paligjshëm është ulur deri në 60%”.
Ministri Hoxha u bëri thirrje qytetarëve që të zbatojnë udhëzimet e Policisë së Shtetit gjatë kalimit në pikat kufitare.
“Bashkëpunimi midis policive është i ndërsjellë dhe ka prioritet lehtësimin e lëvizjes së qytetarëve. Ketë vit kemi një përmirësim sa i përket menaxhimit të kalimit të qytetarëve në pikat kufitare”, theksoi ai.
Ministri i Brendshëm, u pyet edhe për shpërblimin e Policisë për festat e fundvitit, ndërsa theksoi se Këshilli i Ministrave do ta miratojë këtë projektvendim nesër.
“Ministria e Brendshme ka bërë një propozim për heqjen e kritereve dhe përjashtimit të Policisë së Shtetit për sa i përket një kriteri i cili vitet e tjera nuk ka qenë për shkak të buxhetit. Të hënën Këshilli i Ministrave do të miratojë projektvendimin të cilin kemi propozuar për shpërblimin e Policisë së Shtetit. Orët shtesë dhe suplementare janë të përfshira”.
/r.e/
