TIRANË, 17 tetor /ATSH/ Gjykata e Posaçme kundër Korrupsionit (GJKKO) ka dënuar me 9 muaj burg Fatos Lulon, ish-anëtarin e Gjykatës Kushtetuese.
Ish-gjyqtari akuzohet për deklarim të rremë dhe fshehje pasurie, ndërsa dënimi i tij do të konvertohet në 80 orë pune në komunitet, sqaroi sot GJKKO.
Prokuroria e Posaçme kishte kërkuar 1 vit burg për ish-gjyqtarin e Kushtetueses Fatos Lulo dhe kërkoi që ky dënim të konvertohej në 2 vite shërbim prove.
SPAK-u e akuzoi Lulon se nuk deklaroi një dyqan, tashmë nën sekuestro në Rrugën e Durrësit. Hetimet zbuluan se ish-gjykatësi nuk i kishte të ardhurat financiare për të krijuar pasurinë e tij.
Para shkarkimit, prej Vetting-ut në vitin 2018, Lulo pretendonte se prona i është dhuruar nga e motra e vet, bashkë me 100 mijë euro. Vetting-u nxori se as motra e Lulos nuk kishte të ardhura financiare për të blerë e për t’i dhuruar dyqanin vëllait të saj.
Gjyqtari Kushtetues u shkarkua nga shkalla e parë e vetting-ut më 23 mars 2018, vendim i lënë në fuqi edhe nga Kolegji i Posaçëm i Apelimit.
/a.f/r.e/
