TIRANË, 19 mars /ATSH/ Gjatë vizitës në Tiranë, ndihmëssekretari amerikan për Byronë Ndërkombëtare të Narkotikëve dhe Çështjeve të Zbatimit të Ligjit në SHBA, Todd D. Robinson u takua me përfaqësues të Policisë së Shtetit, Agjencisë së Mbikëqyrjes Policore dhe Akademisë së Sigurisë.
Në takim u theksua rëndësia e luftës kundër korrupsionit dhe nxitjes së besimit publik, të cilat janë tipare thelbësore të partneritetit të Shteteve të Bashkuara me Shqipërinë, njoftoi sot Ambasada e SHBA në Tiranë.
Ndihmëssekretari Robinson shprehu mbështetjen e palëkundur të Shteteve të Bashkuara për përpjekjet e zbatimit të ligjit në luftën kundër korrupsionit dhe në rritjen e bashkëpunimit mes institucioneve, transparencës dhe llogaridhënies.
/r.e/
