TIRANË, 16 shtator/ATSH/ “Erzeni” befason në sfidën hapëse të javës së pestë të Superligës, duke mundur në kryeqytet “Tiranën” me rezultatin 1-0. Golin e vetëm të sfidës e shënoi Bekim Maliqi, në minutën e 17-të të lojës, pas një serie kombinimesh mjaft të bukura të skuadrës nga Shijaku.
“Erzeni” me këtë fitore të arritur në Tiranë, shfaqi një mbrojtje solide, të udhëhequr mjaft mirë në Atanda, teksa kundërsulmet mund të kishin sjellë edhe golin e dytë për mysafirët. “Tirana” në kampin tjetër tregoi brishtësi në prapavijë dhe aspak cinizëm në sulm. Veç qarkullimit të topit, djemtë e Orges Shehit, thuajse nuk e rrezikuan fare portën e shijakasve.
“Tirana” pas kësaj disfate në “Selman Stermasi”, mbetet në kuotën e 10 pikëve, e ndjekur pikërisht nga “Erzeni”, që me fitoren e kësaj të premte u ngjit në vendin e dytë përkohësisht në klasifikim, në kuotën e 8 pikëve.
Java e pestë e Superligës vijon këtë pasdite me sfidën “Dinamo City”-“Partizani”, që do të nisë në orën 18:00.
Ndërkohë që të shtunën do të luhen tri sfidat e fundit të kësaj jave. Në orën 15:00 do të luhet sfida “Egnatia”-“Laçi”, në 18:00 do të luhet ndeshja mes “Skënderbeut” dhe “Kukësit”, ndërsa në mbrëmje në orën 20:15, nis klasikja mes “Vllaznisë” dhe “Teutës”.
Klasifikimi pas sfidës së parë të javës së 5-të:
“Tirana” 10 Pikë (5 ndeshje)
“Erzeni” 8 Pikë (5 ndeshje)
“Laçi” 7 Pikë (4 ndeshje)
“Egnatia” 7 Pikë (4 ndeshje)
“Skënderbeu” 5 Pikë (4 ndeshje)
“Partizani” 5 Pikë (3 ndeshje)
“Teuta” 4 Pikë (3 ndeshje)
“Dinamo City” 3 Pikë (4 ndeshje)
“Kukësi” 0 Pikë (4 ndeshje)
/r.e/
