TIRANË, 18 gusht /ATSH/ Nënkryetari i Partisë së Lirisë, Endrit Braimllari deklaroi sot se, “kryetari i bashkisë së Tiranës, Erion Veliaj është përgjegjësi kryesor për mega aferën korruptive të inceneratorit të Tiranës”.
Sipas tij, “heshtja e Erion Velisë tregon qartë përfshirjen e tij drejtëpërdrejtë tek inceneratori i Tiranës”.
“Firma e tij në kundërshtim me ligjin duke marrë kompetencat e këshillit bashkiak, duke dhënë miratimin për studimin e fizibilitetit e bën atë përgjegjësin e drejtëpërdrejtë të kësaj afere korruptive”, tha Braimllari.
“Erion Veliaj në bashkëpunim me drejtorët e tij është i përfshirë drejtëpërdrejtë në procedurën për dhënien me koncesion të inceneratorit të Tiranës, i cili vazhdon të vjedhë cdo ditë qytetarët e Tiranës”, theksoi ai.
“Erion Veliaj dhe stafi i tij i ngushtë janë tërësisht të lidhur me koncesionin 30-vjeçar të inceneratorit të Tiranës. Nga dita e parë që ky projekt mafioz filloi të zbatohej”, u shpreh Braimllari.
“Erion Veliaj është përgjegjës për çdo pagesë që ka kryer Bashkia e Tiranës sepse ka qenë në dijeni të plotë që shërbimi që ofrohej nga inceneratori i Tiranës nuk ishte shërbimi që ishte parashikuar në kontratë. Por, Erion Veliaj vazhdon të paguajë 29 euro për ton”, nënvizoi më tej nën/kryetari i PL.
Ai shtoi se, SPAK duhet të ndalë sa më parë pagesat e Bashkisë së Tiranës dhe të gjithë bashkive të qarkut për një shërbim që nuk merret.
“Çdo ditë që kalon rëndon mbi xhepat e qytetarëve të Tiranës. SPAK duhet të marrë sa më parë të pandehur kryetarin e Bashkisë së Tiranës, Erion Veliaj. Pasi çdo ditë që kalon këto veprime kriminale të kryera drejtëpërdrejt nga Erion Veliaj vazhdojnë të dëmtojnë çdo ditë qytetarët e Tiranës. Inkurajojmë SPAK-un që të shkojë sa më shpejt të Erion Veliaj që së bashku me Edi Ramën kanë ideuar skemën korruptive të inceneratorit”, përfundoi Braimllari.
