TIRANË, 6 korrik/ATSH/ Policia Rrugore e Tiranës, në kuadër të kontrolleve për parandalimin e aksidenteve rrugore, ka arrestuar 22 shtetas në harkun kohor të një jave.
Përmes një njoftimi në rrjetet sociale, Policia e Tiranës bëri me dije sot se, 22 shtetasit e ndaluar, u kapën duke drejtuar automjetin në gjendje të dehur, apo nën efektin e lëndëve narkotike dhe për shkelje të rregullave të tjera të qarkullimit rrugor.
“Gjithashtu, gjatë javës që lamë pas janë vendosur: 261 masa administrative për shpejtësi mbi normat e lejuara; 586 masa administrative për përdorim të aparatit celular gjatë drejtimit të mjetit; 55 masa administrative për xhama të errësuar; 352 masa administrative për mosdhënie përparësi këmbësorëve, në vijat e bardha; 1487 masa administrative për mosvënie të rripit të sigurimit, nga drejtuesit e automjeteve; 367 masa administrative për mosvendosje të kaskës mbrojtëse, nga drejtuesit e motomjeteve; 224 masa administrative për parakalime të gabuara”, përfundon njoftimi i Policisë së Tiranës.
/r.e/
