PRISHTINE, 26 prill/ATSH/ Në Kryeministri, të mërkurën, kryeministri i Kosovës, Albin Kurti, mirëpriti familjarët e shkrimtarit dhe studiuesit të njohur shqiptar nga Durrësi, Moikom Zeqo.
Me bashkëshorten Lida Miraj dhe djalin Epidamn Zeqo, evokuan kujtime për të ndjerin Zeqo, që iu dha lamtumira e fundit në qershor të vitit 2020.
“Miraj dhe Epidamni, që të dy autorë edhe vetë, i dhuruan kryeministrit librat autorialë të tyre bashkë me një libër të Moikom Zeqos, të cilët Kryeministri Kurti i pranoi me kënaqësi. Shkrimtari Moikom Zeqo, përveçse autor i suksesshëm, ishte edhe ministër i Kulturës, deputet i Kuvendit dhe drejtor i Muzeut Historik Kombëtar në Tiranë. Vitin tjetër ai do të festonte 75-vjetorin e lindjes”, thuhet në njoftim.
Kryeministri Kurti falënderoi familjarët për vizitën dhe tha se kujtimi për Moikomin do të jetojë gjithmonë përmes librave, veprave, fjalëve dhe këshillave të tij. /KosovaPress/
