TIRANË, 5 prill/ATSH/ Kryeministri Edi Rama reagoi sot lidhur me hartën e prezantimit të presidentit të ‘Melia Group’ gjatë punimeve të Konventës Ndërkombëtare të Turizmit, ku mungonte Kosova.
Kryeministri sqaroi se, harta ishte pjesë e prezantimit të presidentit të gjigantit spanjoll “Melia Group”, dhe dihet që Spanja ashtu e ka hartën e rajonit.
“Kinse patriotët kanë gjetur punë sot duke u marrë me një hartë të prezantimit të presidentit të gjigantit spanjoll ‘Melia Group’ në konventën e turizmit, ku mungonte Kosova! Dihet që Spanja ashtu e ka hartën e rajonit po asgjë e keqe s’i erdhi kombit nga dalja 1 minutë e asaj harte”, u shpreh Rama.
Sipas tij, “Shqipëria s’është Irani, ku të ftuarve në konferenca ndërkombëtare u kontrollohen prezantimet dhe as Konventa s’ishte sheshbeteja diplomatike për njohjen e Kosovës nga Spanja”.
“E keqja kombit tonë i vjen bash nga ata që merren tërë ditën me kësi luftërash pa lidhje mes shqiptarësh”, theksoi ai.
/m.m/ /gj.m/r.e/
