TIRANË, 19 mars/ATSH/ Prefekti i Qarkut Korçë, Nertil Jole, ka udhëtuar drejt Dardhës, prej nga ku ka sjellë një album fotosh mbresëlënëse, me tokën ende të mbuluar krejtësisht nga dëbora, megjithëse kemi hyrë në stinën e pranverës.
Prefekti ka vizituar një nga zonat më të frekuentuara nga turistët dhe të apasionuarit e skive, pistën e skijimit Bigell.
“Pasioni dhe dëshira për të ndërtuar një sipërmarrje të veçantë, bënë të mundur që falë përpjekjeve familja Tasho, të ndërtonte qendrën e parë te skijimit në vend, me një vlerë të madhe për zhvillimin e kulturës së skijimit në Shqipëri”, shkruan prefekti Jole në një postim në rrjetet sociale.
Ski-Pista Bigell ka nisur të ndërtohet në vitin 2008, prej Thoma Tashos, së bashku me dy fëmijët e tij, Sokrati dhe Paola, një familje sportistësh të apasionuar. Qendra është e pajisur me 3 pista, një teleferik dhe një “tapet magjik” i cili iu vjen në ndihmë femijëve dhe fillestarëve.
“Adresimi i problematikës së parkimit të mjeteve që e vizitojnë këtë atraksion me një fluks të madh, kryesisht përgjatë fundjavave në sezonin e dimrit, mbetet një çështje që dakortësuam për ta ndjekur bashkarisht me aktorët përgjegjës”, shkruan prefekti i Korçës, sipas të cilit kjo është një domosdoshmëri për të garantuar qarkullimin normal të automjeteve drejt këtij destinacioni e për të mos penguar lëvizjen e banorëve të Dardhës dhe frekuentimin e bizneseve të tjera të zonës.
/gj.m/
