TIRANË, 7 mars /ATSH/ Monitorimi i jetës së egër përmes kamerave kurth është një proces i rëndësishëm për t’u dokumentuar përgjatë sezonit dimëror.
Agjencia Kombëtare e Zonave të Mbrojtura bëri të ditur përmes një postimi në rrjetet sociale se, janë instaluar disa kamera të reja kurth në Parkun “Mali i Tomorit”.
“Pas dokumentimit të disa prej të dhënave të dokumentuara nga kamerat kurth, të vendosura në Parkun “Mali i Tomorit”, specialistët e AdZM Berat ndodhen sërish në terren, për të instaluar disa kamera të reja. Monitorimi i aktiviteteve jetësore të kafshëve është një procesi vazhdueshëm”, shkruan AKZM.
Vendosja e kamerave kurth në zonat e mbrojtura ka për qëllim vrojtimin e faunës së egër që ndodhet në këto zona. Llojet e faunës së egër jetojnë të qeta në habitatet e tyre falë moratoriumit të gjuetisë.
Zgjatja e moratoriumit deri në vitin 2025 ka si qëllim përmirësimin e gjendjes së llojeve të faunës së egër.
/r.e/
