TIRANË, 28 shkurt/ATSH/ 120-vjetori i ndarjes nga jeta të shkrimtarit e poetit, Jeronim De Rada, ka bërë bashkë Qendrën e Studimeve dhe Publikimeve për Arbëreshët (QSPA) dhe Qendrën Kombëtare të Librit dhe Leximit, të cilat kanë organizuar një veprimtari kulturore, pranë ambienteve të QKLL.
Kjo veprimtari u moderua nga studiuesja e QSPA, dr. Jolanda Lila dhe morën pjesë me kumtesat e tyre prof. Ymer Çiraku, dr. Leka Ndoja, dr. Manjola Tërshana dhe dr. Jolanda Lila.
Njëkohësisht, në sallën “Kostandin Shpataraku”, Muzeu Historik Kombëtar organizoi një bisedë me temë “Erdhi dita e arbërit”. Për të folur mbi jetën e veprën e Jeronim De Radës, në Muzeun Historik Kombëtar i ftuar ishte prof. dr. Sadik Bejko.
Muzeu Historik Kombëtar si institucioni më i madh i memories kombëtare organizon një cikël me leksione të hapura me temë trashëgiminë kulturore dhe historinë, të cilat do të vijojnë për ta kthyer muzeun në një qendër kërkimore dhe shkencore për të rinjtë. Edhe aktiviteti i sotëm kushtuar De Radës, u zhvillua në këtë kuadër.
/r.e/
