ATHINË, 21 shkurt /ATSH-DPA/ – Sekretari amerikan i Shtetit, Antony Blinken i ka bërë thirrje qeverisë greke të jetë e duruar në mosmarrëveshjet me fqinjin e saj Turqinë.
”Ndihma e shpejtë e Greqisë nga tërmeti për rajonet e prekura u prit shumë mirë në Turqi”, tha sot Blinken në një konferencë shtypi në Athinë.
Ai tha megjithatë se shkrirja e marrëdhënieve mes dy vendeve që nga tërmetet nuk i zgjidh problemet e kahmotshme.
”Tani është e nevojshme të shmangen kërcënimet që rrisin tensionet”, tha kryediplomati amerikan.
Blinken vizitoi Turqinë e goditur nga tërmeti përpara se të mbërrinte në Greqi.
Athina dhe Ankaraja kanë debatuar për të drejtat sovrane në Egje dhe në Mesdheun Lindor për dekada.
Në muajt e fundit, presidenti turk kishte kërcënuar vazhdimisht se do të pushtonte ishujt grekë.
Blinken theksoi se të dy vendet janë partnerë të Uashingtonit, i cili komunikon dhe bashkëpunon me ta për të shmangur tensionet, por shtoi se kjo ka qenë më e vështirë gjatë periudhave zgjedhore të vendeve.
Në Turqi, presidenti Rexhep Tayyip Erdoan i shtyu zgjedhjet në maj.
Në Greqi, zgjedhjet janë planifikuar për në korrik./ a.jor.
