LONDËR, 21 tetor /ATSH-AA/ – Cristiano Ronaldo u hoq nga lista e skuadrës së Manchester Unitedit për ndeshjen kundër Chelseat, këtë fundjavë, pasi trajneri holandez, Erik ten Hag e ndëshkoi yllin portugez për largimin e hershëm nga ”Old Trafford” gjatë ndeshjes së së mërkurës me Tottenham Hotspurin.
“Cristiano Ronaldo nuk do të jetë pjesë e skuadrës së Manchester Unitedit për ndeshjen e kësaj të shtune kundër Chelseat”, thuhet në një deklaratë nga Manchester United.
“Pjesa tjetër e skuadrës është plotësisht e përqendruar në përgatitjen për atë ndeshje”, shtoi klubi anglez.
Manchester United mundi 2-0 Tottenham Hotspur-in në ndeshjen e së mërkurës.
Djajtë e Kuq po kryesonin ndeshjen me 2-0 ndaj Spurs, megjithatë, ylli portugez 37-vjeçar u drejtua drejt tunelit pak minuta para përfundimit të ndeshjes, duke u shfaqur i frustruar pasi mbeti zëvendësues gjatë lojës./ /os/
