TIRANË, 6 maj /ATSH/ Policia e Tiranës finalizoi operacionin policor të koduar “Gaminator 3”, për goditjen e veprimtarisë së paligjshme në fushën e lojërave të fatit.
Gjatë operacionit janë sekuestruar, në ambientet e një lokali, 8 makineta që përdoreshin për lojëra fati. Gjithashtu është shpallur në kërkim pronari i tyre, i cili kishte vendosur në dispozicion lokalin, për ushtrimin e aktivitetit të kundërligjshëm të lojërave të fatit.
Policia e Shtetit njoftoi sot se, shërbimet e Komisariatit të Policisë Nr. 4, në vijim të kontrolleve të ushtruara në lokale dhe ambiente të ndryshme, me qëllim evidentimin dhe goditjen e rasteve të ushtrimit të lojërave të fatit, bazuar dhe në informacionet e marra në rrugë operative, organizuan dhe finalizuan operacionin “Gaminator 3″.
Në kuadër të këtij operacioni u bë shpallja në kërkim e shtetasit: S. B., 59 vjeç, banues në Tiranë, për veprat penale “Organizimi i lotarive të palejuara” dhe “Vënia në dispozicion e lokaleve për lojëra të palejuara”.
Gjatë kontrollit të ushtruar në lokalin në përdorim nga ky shtetas, në zonën e quajtur ”Selvia”, shërbimet e Policisë gjetën dhe sekuestruan në cilësinë e provës materiale 8 makineta që përdoreshin për lojërat e fatit, teksa vijon puna për kapjen e shtetasit S. B.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme, për veprat penale “Organizimi i lotarive të palejuara” dhe “Vënia në dispozicion e lokaleve për lojëra të palejuara”.
/j.p/r.e/
