TIRANË, 25 shkurt /ATSH/ Ambasadori i Italisë në Shqipëri, Fabrizio Bucci deklaroi sot se, situata në Ukrainë tregon se sa e rëndësishme është që Evropa të lejojë dhe të pranojë një shtrirje më të gjerë në vendet e Ballkanit Perëndimor.
Nga Korça ku mori pjesë në një takim me drejtues të Universitetit, ambasadori Bucci komentoi zhvillimet në Ukrainë si edhe qëndrimin e BE, veçanërisht në Ballkanin Perëndimor.
Ndërsa dënoi agresionin rus në Ukrainë, Bucci tha se e ardhmja e Ballkanit është një e ardhme evropiane.
“Qasja e Evropës ndaj Ballkanit Perëndimor nuk ndryshon, e ardhmja e Ballkanit Perëndimor është një e ardhme evropiane dhe Shqipëria, shpresoj të ketë këtë vit një afrim më shumë me integrimin në BE”, tha ai.
“Ne dënojmë situatën që është duke u zhvilluar. Pra e ardhmja e Ballkanit është një e ardhme evropiane”, u shpreh ai.
Ambasadori italian theksoi se, kjo situatë tregon edhe më tepër se sa e nevojshme është që Evropa të lejojë dhe të pranojë një shtrirje më të gjerë në vendet e Ballkanit.
I pyetur nëse do të ketë një datë për Shqipërinë, për mbajtjen e Konferencës së parë Ndërqeveritare, Bucci theksoi se, “Italia ka qenë gjithnjë në rresht të parë për të mbështetur anëtarësimin e shteteve të Ballkanit në Evropë”.
“Kjo situatë në Ukrainë tregon edhe më tepër se sa e nevojshme është që Evropa të lejojë dhe të pranojë një shtrirje më të gjerë në vendet e Ballkanit”, u shpreh ai.
/a.a/r.e/
